Es Chingli, es Gschöpfli vo Gottes Hang,

uf di hei mir gwartet so grüseli lang.

Jetz lisch i mim Arm du härzigs Wäse

mir wei dir d Wünsch vo de Ouge läse!

 

Am 14. Septämber 2017 isch SELINE uf d Wäut cho. Si isch d Tochter vo Helen Hirschi u Beat Blum. Mir gratuliere o dere chliine Familie vo Härze u wünsche ne viu Glück u gfröits mit ihrem Töchterli.

Es isch d Natur, wo öppis bsundrigs üs git,

es vierblettrigs Chleeblatt muesch sueche gar wyt.

Mir heis grad hüt gfunde u wette dir säge:

Grüessti du Wunder, du herrlechs nöis Läbe!

 

Am 4. Septämber 2017 isch d NADIA  uf d Wäut cho. Si isch d Tochter vo Dänu u Chistina Blum u d

Schweschter vom Matthias! Mir gratuliere dere Familie härzlech zum Töchterli!

Üse Wettvortrag:

Eidg. Jodlerfest Brig_Glis 2017 23-25.Juni

Ökomenische Gottesdienscht 24. Juni Eidg. Jodlerfest Brig im Stockalpergarten

 

Dr JK Grosshöchstette u dr JK Schüpbach hei d Ehr gha am ökomenische Gottesdienscht im Stockalpergarte em Samschtig am Eidg. Jodlerfescht ds Brig ds singe!

"Ohni Wort", Üse Chirschiboum" u dr "Tummligratjutz" hei mir zum Beschte gäh! Heiss isches gsi, aber idrücklech! Danke allne zäme!!

Hochzyt Daniela und Peter Thierstein

 

 

 

 

 

 

Am 29.04.2017 hei sech d Daniela u Peter Thierstein i dr Chiuche Sigriswil ds chirchliche Jawort gäh!

Mir si zu däm Hochzit wie zur Toufi vom Andrin i dr Chiuche ga singe!

E schöne u fiirleche Alass isches gsi, mir danke viumal für d Iladig u wünsche dere härzige Familie nume ds Beschte!

 

Öie Jodlerklub Grosshöchstette

 

Das isch üse Wältmeischter dr Luca Aerni , alässlech zu sim Fescht vom Mäntig dr 20.02.2017 hei mir Grosshöchstette-Jodler ihm dörfe mit eme Liedli ga gratuliere! Es isch e Fröid, we so jungi Mönsche us üsere Region e settige Erfolg hei! Mir si stolz uf e Luca u wünsche ihm nume z Beschte!

 

Üse Emil Stricker isch am 11.Februar 2017 z

Tramelan zum Ehreveteran gehrt worde!

Mir gratuliere ihm ganz härzlech u wünsche ihm no witerhin vil gfröiti Stunge i üsne Reihe!

Öppis nöis gitts no! Am 15. Oktober hei mir de e Uftritt agno! Mir dörfe zum JK Schwarzebärg ga singe

u fröie üs scho druf!

 

 

Am 29. April 2016 hei d Daniela Amstutz u dr Peter Thierstein sech im Schloss ds Schlosswil ds JA-Wort gäh u jetz knapp 3 Monet speeter hed dr

ANDRIN THIERSTEIN am 22. Juli 2016 ds Liecht vor Wält erblickt.

Mir vom JK Grosshöchstetten wünsche däm junge Ehepaar u Elterepaar mit ihrem Bueb alles Guete, viu Glück u willkomme ir Jodlerfamilie!

 

 

Das härzige Chäferli heisst:

Laura Beatrice

si isch am 25. Novämber 2015 uf d Wält cho

äs isch d Tochter vor

Nathalie u Jonas Fiechter

Mir vom JK Grosshöchstette wünsche öich viu Glück zu öiem Sunneschiin!