Am Sunntig der 10. März si mir ume mau uf Adligenswil/Lu zum Walter Fölmli ga zwöi Lieder ufnäh, somit nimmt üsi CD langsam gstaut a u isch am wachse.

Im grosse u ganze hei mir die zwöi Stück flott ufgno, da üs t Miriam tipp topp vorbereitet het.

So si mir am früechere Aabe ume daheime gsi,u hei der Sunntig no chönne gniesse.

Merci Walti Fölmli hesch du dir Ziit gno, u mit üs witer a üsere CD z'schaffe.

Mir gloube es chunnt guet.

Scho ume isch es Intensivs u Interessants Jodlerjahr düre u isch mit üsere Houptversammlig rückblickend abgschlosse worde.

Nachemne feine Ässe het üse Presidänt t Versammlig pünktlech eröffnet u mitem Traktandum 1 chönne starte.

Es het mau meh u mau weniger z diskutiere gä, aber es isch doch zügig vorwärts gange.

Mitemne schöne Jahresrückblich hei mir z vergangene no mau chönne revue passiere, wo doch einiges los isch gsi im letschtä Jahr.

Ahh... u der Name vo üsere CD heimer ono chönne bestimme....

Peter Thierstein isch 25 Jahr im Bernisch-Kantonaler Jodlerverband u somit zum Veteran geehrt worde, u bi üs ar Versammlig zum Ehremitglied vom JK Grosshöchstetten. Merci viu mau was du i dere Zit gleischtet hesch füre Klub,u was du i Zuekunft no aues machsch. Uf di nächschte 25 Jahr...

Sit emä haube Jahr singt der Dänu Schmutz vo Mirchel bi üs im 2. Bass.

Höchschti Ziit di offizell i üsem Klub ufznäh.

Schön isch ume e junge Maa meh i üsne Reihe,wo fröid am Singe u Jutze hett.

Dänu, mir wünsche dir viu gmüetlechi Stunde bi üs u dases no mängisch luschtig zue u här wird ga.

O das Jahr würde mir üs fröie we dir bi öiem ichouf ide Migros Filiale würdet d Vereinsbon sammle u em Jodlerklub Grosshöchstetten würdet spände. Merci viu viu mau.

Unger Jodlerklub Grosshöchstetten | Migros finget dir gneueri Informatione.

Am Wucheänd vom 19. - 21. Januar hei mir z’Obergoldbach üses Jahreskonzärt gha.

Für üs Jodler hets scho am Fritignamittag agfange, mit zwäg mache u schmücke vor Mehrzwäckhaue.

Es geit afe schnäu bis mir fertig si, jede weiss was är muess mache.

Am Aabe am 18.00 Uhr isch när Türöffnig gsi u t’Chuchimannschaft isch gwappnet gsi t’Gescht

mitemne feine z’Nacht z’verwöhne.

Am 20:00 Uhr isches när los gange - volli Konzentration - üses Konzärt het agfange.

Voreme ufmerksame Publikum hei mir üser Vorträg chönne zum Beschtä gä u zeige für was mir es

Jahr lang güebt hei.

Nöi hei verschiedeni Gaschtformatione üses Programm bericheret u diversi Chliiformatione das

musikalisch Wucheänd abgrundet. Viele härzleche Dank!

Am Sunntig nachem singe isch när no ufrume u putze ufem Programm gstange, u o hie si mir afang

schnäu u speditiv ungerwägs. De heimer nach getaner Arbeit, erschöpft aber z’fride, ufenes

erfougrichs Konzärt chönne zrügg luege.

Merci viu, viu mau aune Häuferinne u Häufer wo üs so tatchräftig ungerstützt hei,ohni öich wär das

nid müglech gsi.

U itz heissts ume üebe, üebe u no mau üebe für z nächschte Konzärt im 2025

Bis gli…

Bilder unter: Konzert 2024 Jodlerklub Grosshöchstetten (bern-ost.ch) oder bi üser Homepage unger `"Üser Uftritte u süsch Heugeli"

Z Wätter isch em Name aui Ehr worde,bi verschneeiter Landschaft hei mir ir Chiuche z Grosshöchstette üses jährleche Adväntskonzärt gha.Trotzdäm vile Schnee hei hüüfe Bsuecherinne u Bsuecher der Wäg it Chiuche gfunge.

Mir hei üser Vorträg zum beschtä gä u hoffentläch dä Lüüt chönne e Fröid mache.

Ä Wiehnachtsgschicht vor Miriam,u diversi Chliformatione vo üs, hei der Aabe abgrundet.

Merci viu mau aune wo si cho iche lose u wünsche öich no e schöni Adväntsziit.

Am hütige Sunntigmorge si mir ume mau uf Adligenswil/Lu  gfahre für a üsere CD ga witer z schaffe.

Bi däm strube Wätter isch doch das grad ä gueti Beschäftigung gsi.

Mir hei üs bi dä Probe vorhär so guet wie müglech vorbereitet u flissig güebt, dass mir die vier Vorträg schön u suber chöi ufnäh u am Aabe ume Daheim si.`Mir si aui konzentriert am Wärch gsi u so isch dä Sunntig e churzwilegi Sach gsi. Z Üebe hetsech auso glohnt u d' CD isch am wachse...Danke Walti Fölmli, dass du dr Sunntig mit üs verbracht hesch.

Im Oktober isch das haube Jahr Probeziit düre gsi u es fröit üs sehr das Fuchser Mario vo Zäziwil nöi im Jodlerklub isch.

Es isch geng schön we jungi Lüt gärn düe Singe u üses Bruchtum wei pflegä.

Mario...schön bisch bi üs u wünsche dir no viu tolli Momänte im Klub.

Wöu üses Probelokal, z Pintli z Grosshöchstette, no Betriebsferie hett gha, heimer üsi Singprob bi üsem Presidänt, em Dänu Blum im Stau gmacht.Ar Vorschou,wis bi üs umenang heisst,heimer o grad chönne kontrolliere ob är t Chüe suber het gwäsche, wöu si am nächschte Tag z Chonufinge hei Viehschou gha.

Mo mou...glänzt u gstrahlet hets im ganze Stau, t Chüe si aui useputzt gsi.

Da darf natürlech e schöne Jutz nid fähle, so heimelig wis grad isch gsi...

Bi chli Singe u Jutze,es feins Würschlti u öppis z trinke ir Hang, was wotme no meh..

Mir Wünsche em Dänu viu Glück für e morgig Tag, u bedanke üs für die tolli Gastfründschaft.

Am Sundig Morge hei mir, wie aui Jahr am Bättag ,t Predigt ir Chiuche z Grosshöchstette Musikalisch dörfe umrahme.Isch mängisch nid ganz eifach, am Morge früech scho grad zwäg z si für es Lied oder e Jutz, aber im grosse u ganze isch es gloub guet acho.

Nachemne Stück Züpfe u ämne Glessli Wysse simer nähr ume richtig heizue.

Bi Kohler's z Niderhünige hei mir bi beschter Ussicht üse Jährlech Brätli Sunntig chönne ha.

Mit aune Häuferinne u Häufer, u de Theater Lüüt, hei mir bi wunderschönem Wätter chli Grilliert u öppis

z trinke hets natürlech o gä. So heimer üs no mau wöue bedanke für dä super Isatz wo si gleischtet hei a üsem Konzärt 2023.

Merci viu mau...

T Ching hei chönne spile, u die Eutere chli Singe u plöiderle. So isch de dä Sunntig grad mau düre gsi, u de isch me mit vouem Mage u viune schöne Idrück ume richtig Hei zue, ga der Tag la usklinge....

Das haube Jahr isch düre, u somit offiziell im Jodlerklub...

Der Samuel Siegenthaler vo Grosshöchstette

Sämu wird t Sänger im 2. Tenor ungerstütze.

Mir wünsche dir viu schöni u gmüetlechi Stunde, u das es no mängisch Luschtig zue u här wird ga.

Zum 20-jährige Jubiläum vom Pintli z'Grosshöchstette het üs z'Heidi am Donnschtigabe mit angerne Vereine, Lieferante und Stammgescht iglade zum Fiire. Es isch e sehr z'friednige u gmüetleche Event gsi u üs hets a nüt gfähut.

A derä Steu wette mir dir, Heidi, nomau DANKE FÜR AUES, wo du für üs machsch u Donnschtig für Donnschtig üses Gjammer muesch alose. Mir si sehr wohu bi dir u hoffe mir chöi no viu Jahr zu dir cho Probe.

Ä grosse Dank geit oh a dis Team, wo geng so fründlech u ufgsteut isch u mängisch o nach dä 22:00 Uhr nomau d'Fritteuse ahlat oder Glacechugle formt.

!DANKE VIU VIU MAU!

Üse letscht Uftritt vor dr Summerpouse hei mir no uf ungwohntem Terrain düre gführt.

Am Thali-Rock z'Schlosswiu hi mir üs zwüsche Schlagzüüg u Stromgitarrene igreiht. 

Für üs wie o hoffentlech für d'Bsuecher isch das mau öpis angers gsi u mir hi ä huufe postivi Rückmäudige übercho.

Itz wünsche mir öich ä schöne Summer u bis gli...

Rock 'n' Jodel

Ganz nachem Motto "Übe wie du kämpfst" hei mir üsi letschti Singprob vorem Uftritt am Thali-Rock dusse düre gführt.

Ufem Parkplatz bim Schützehüsli, hi mir bimä wunderbare Summerabe, üsi Jütz u Lieder über Höchstette igsunge.

Ä grosse Dank geit a d'Schütze für ihri Gaschtfrünschaft.

Am Mäntig, 26.06.2023, hi üs üser Jodlerkamerade vo Schüpbach zum aujähleche Brätle, das mau im Schützehuus uf dr Mutte, iglade.

Mir si, wie geng, flott bewirtet worde u hei eifach dörfe härehocke. Danke viu mau!

A däm wunderbare Sommerabe hi mir de natürlech o no chli zäme i d'Nacht iche gsunge.

Äs isch ä zfriednige u gmüetläche Abe gsi - Merci tuusig!

Äntlech, nach 30.Jahr schaffe mir wieder are CD vom Klub.

Am 22.06.2023 si mir am Namittag uf Adligenswiu zum Walter Fölmli greist. Guet vorbereitet hi mir die erschte zwöi Lieder uf üsi  nöii CD ufgno. 

Mit vouem Elan üebe mir für die witere Lieder u si schlussändläch gspannt uf üsi CD!

Jodle fägt!

Mir bedanke üs bi öich fliessige Sammler für 2'290 Vereinsbons, wo dir bir Migros für üs igreicht heit.

Das het üs satti CHF 654.00  hi d'Vereinskasse gspüuht.

Viele härzleche Dank!

Die ganzi Jodlerfamilie vom ehemalige Amt Chonufinge het sich am Samschtig z'Bowiu troffe.

Ei Klub umä anger het si Vortrag ire schön gfüute Feschthütte zum Beschtä gä. Mit Härdöpfusalat u Hamme hei mir üs d'Büch vou gschlage u hei no es Gsamtchorlied gsunge. 

Danke für die super Organisation u dä gmüetlech Abe.

Föteli finget dir uf Amtsjodlertreffen Konolfingen in Bowil (bern-ost.ch)

Am Samschtigabe si mir umä ih Car ihgstige u richtig Rickebach SO gfahre. Dert hi mir dr Jodlerklub Gäu Egerkingen bi ihrem Ungerhautigsabe dörfe ungerstütze. Ire voue Mehrzwäckhaue hi mir üs wie geng "ids Füdlä klemmt" u ds Publikum het üs ufmerksam zueglost.

Mir danke am Jodlerklub Gäu für d'Iladig, dä gmüetlech Abe u natürlech für die feini Verpflegig.

Ä grosse Dank geit o ah z'Carungernähme "Neukomm" für da ihwandfrei Service - mir hi chönnä ih- u usstige u üs ganz uf d'Jodlerei konzentriere.

Bis zum nächschte Mau...

Meh Informatione finget dir unger dr Rubrik -Auftritte / Jahresprogramm- 

oder www.jk-gaeu.ch 

Am Sunntigmorge am 06:00 Uhr isch üse Car z'Grosshöchstette richtig Bodesee abgfahre.

Nach knapp drü Stung si mir i däm Altnau bir Mehrzwäckhaue acho u si fründlech begrüesst worde.

Nacheme erschte Konzärtblock am Morge hets äs feins Apéro u äs wunderbars Z'Mittag gä. Am Namittag hi mir nomau mit de angere Klüb üser Lieder u Jütz zum Beschte gä.

Im Name vom ganze Klub wette mir dä Organisatore vo Härze Danke säge für die super Dührefüherig, für d' Verpflegig u für dä gmüetlech Sunntig.

Danke viu mau!

Unger dr Rubrik "Üser Uftritte u schüsch Heugeli" finget dir paar Ihdrück mit Föteli. 

Mir würde üs fröie, we dir üs mit de Bon's wo dir füre Ichouf bir  MIRGOS überchömmet, würdet ungerstütze!

Merci viu mau.

Unger:

www.supportculture.migros.ch

finget dir meh Informatione

Mir hi a Huufe nöii Föteli u Videos uf dr Homepage ucheglade. 

Göt doch mau i de verschiednige Rubrike chli ga schnöige...

O z'provisorische Jahresprogramm finget dir.

Am 5. März si mir zum Bispiu aus Gaschtklub z'Altnau im Öpfudorf iglade. 

Nach zwüne länge Jahr hi mir umä mau es Konzert u Theater chönne z'Obergoudbach ir MZH düreführe. Es isch nid lang gange u de het jede umä gwüsst, was er muess mache u wo si Platz isch - Glehrt isch haut glehrt.

Chömä äch de di Lüüt wieder? Oder hei si üs sogar vergässe? Isch z'Sofa gäbiger aus d'Feschtstuhlig?

Das hi mir üs geng u geng umä gfragt.. D'Närvosität isch oh grösser gsi aus angeri Jahr.

När isch es äntlech sowit gsi, no drzue dr Fritig dr 13., es isch achti gsi u dr Vorhang geit uf...

Läck, isch das schön gsi! Mir hi drü mau vore guet besetzte Merhzwäckhaue dörfe üser Lieder u Jütz zum Beschte gäh.

Mir hi üs ganz fescht itz "Füdli" klemmt u es ufmerksams Publikum het üs das danket.

Oh üser Theaterlüüt hei es ganz es luschtigs Theater dörfä ufführe u hei dir eint oder anger zum Lache bracht. 

DANKE, DANKE VIU MAU!!! Schön sit dir so zauhrich erschine u heit üs so ufmerksam zueglost.

Oh ä grosse Danke geit a üsi Jodlerfroue u zahuriche Häufer! Merci!

Witeri Föteli finget dir bi dä "Heugeli" 

Mir wünsche öich vo Härze äs wunderbars, erfougriichs u grossartigs Neus Jahr 2023 - uf viu schöni, unvergässlächi u singfreudegi Momänte im Jodlerklub Grosshöchstette. 

Äs Hoch ufd's 2023!

Nid vergässe - abem 04.01.2023 chöt dir öiiä Platz für üses diesjährige Konzert & Theater reserviere.

Äs würd üs sehr fröiä, viu vo öich z'gseh u ir Turnhaue z'Obergoldbach z'begrüesse.

Idämfau bis gli.. 

Ih üsere letschte Singprob, vom 15.12.2022, hei mir Bsuech gha vom Gsangslehrer, Erich Stoll. 
Er het üs spannendi u hiufrichi Atemtechnike u -methodene ufziigt u glehrt - äs isch für die meischte vo üs ä nöii Erfahrig gsi.
Mir danke am Erich Stoll ganz härzläch füre Bsuech bi üs in Grosshöchstette - äs het gfägt.

So schnufe mir itze richtig u korrekt am neue Jahr entgäge.. 

Mir vom Jodlerklub Grosshöchstette wünsche öich aune e bsinnlechi Adventszyt u schöni Feschttäg mit öine Liebschte.

U wär no kes Gschänkli het oder schüsch eifach öperem wet ä Fröid mache, für dä hi mir genau z'Richtige!

Neu chame bi üs Gratis-Itritte bsteuä.

Z'Stück choschtet 15.-Fr. + Versandchoschte.

Bsteuä chöit dir die direkt bimä Jodler vo üs, wo dir kennet, oder bim Peer Moser unger dr Telefonnummere 079 627 17 10.

Nach langer Ziit hei mir ändlech ume mau es Adventskonzert dörfe düreführe.

D'Chiuche isch bis ufe hingerletscht Platz gfüut gsi u mir hi üs aui ganz fescht itz Füdlä klemmt!

Näbem Klub hei o no drü verschiednegi Duett u Quartett mit ihrne Vorträg d'Chiuche verzouberet.

Üsi Märlitante d'Miriam het wieder ä wunderbari Wiehnachtsgschicht uf Lager gha u het diä üsem ufmerksame Puplikum dörfe verzeuä.

Mir danke vo Härze aune, wo dr Wäg i d'Chiuche gfunge hei. U dene, wos nid isch müglech gsi z'cho, giits hie es chlises Müschterli wie das öpä tönt het.

Häbit ä schöni Adventsziit u viellech bis gli a üsem Konzert u Theater vom 13.-15. Jänner 2023 z'Obergoudbach.

Am Samschtignamittag si mir zäme mit dä Auperöseler Heimenschwand im Car uf Dornach greist. Dert hei mir am Jodlerkonzärt vo dä Schwarzbuebejodler dörfä ufträte. 

Mir hei nid schlächt gstuunet, wo mir z'Dornach vor däm Goetheanum gstange si... so es spezieus Geböide het gloub no kenne vo üs gseh. Ganz e grandiosi Architektur!

Wo mir de äntlech dr Wäg uf d'Bühni hei gfunge, hei mir no grad mau läär gschlückt. E richtige Konzärtsau, wie im Fehrnseh!

Nachdäm mir üs langsam igläbt hei, isch es de o scho los gange.

Voreme ufmerksame Publikum hei mir üser Lieder u Jütz abwächsligswis mit dä angere Formatione dörfä vortrage.

Nachem offizieuä Konzärt hei mir ir Mensa vom Goetheanum witer gfeschtet u gsunge u si de zu später Stung mitem Car wieder daheime im Ämmitau acho.

Mir Danke dä Schwarzbuebjodler für d'Gaschtfründschaft u das bsundrige Erläbniss.

Am Samschtigabe si mir uf Iladig vo üsere Miriam uf Luterbrunne greist. Dert hei mir mit ihre u ihrne "Jodle fägt"-Kursteilnähmer:inne es Konzert/ e Üebig ir Chiuche dörfä gä. Es het, wies haut so geit bire Üebig, nid aus uf Ahieb klappet, drfür isches e sehr luschtige u gmüetleche Abe gsi.

Bim aschliessende z'Nachtesse hei mir üser Jodlerbüch gfüut u ab und zue no e Jutz gno.

Miriam, mir danke dir härzläch, dass du üs geng umä mitschleipfsch u motiviersch, oh wet üs mit settigne Aktionen geng chli us dr Komfortzone uselocksch...

Aber ig gloube, mir bruche das ä chli!

- Jodle fägt! -

Wie au Jahr hei mir am Sunntig d'Predigt musikalische dörfe begleite.

Es isch ä wunderbare Morge gsi.

Sit emä haube Jahr singt dr Bärnu Siegethaler scho bi üs im 2.Bass.

Es isch auso höchschti Ziit gsi, ihn ir vergangnige Singprob offiziell ih üsi Reihe ufznäh.

Bärnu, du bisch ä Bericherig für üse Klub u mir wünsche dir viu schöni u gmüetlechi Stunge bi üs.

Am Sunntig si mir mit Ching u Chegu uf d'Marbachegg greist.

Dert hei mir bi schönschtem Wätter e richhautig u feine Brunch dörfä gniesse. Gross u Chli hei sich bi verschiednige Aktivität uf dr Marbachegg chönne vertöörlä.

Es isch schön gsi, umä mau mit dr ganze Jodlerfamilie chönne ä Usflug z'mache.

Ä grosse Dank geit ah Martin Wüthrich, wo dä schön Tag für üs organisiert het.

MERCI!

Am letschtä Sunntig hi mir nach zwünä Jahr umä mau äs Amtsjodlerträffe gha. 

Z'Gümlige im Mattehofsau hi mir z'Lied "Alphornruef" vom Alfons Gugler voreme ufmerksame Publikum dörfä zum Beschtä gäh.

Es isch schön gsi, wieder mau unger Glichgsinnte zäme z'hocke, z'dorfe, z'singe u z'plagiere.

Ä grosse Dank geit natürlech ah Jodlerklub Aaretau Gümlige, wo das Träffe het düregführt u ah aui Fründe u Bekannte, wo si cho losä.

Wie immer finget dir no meh Foto's unger dr Rubrik "Üser Uftritte u schüsch Heugeli".

Zäme mitem Jodlerklub Schüpbach hi mir am Donnschtig wieder mau es Brätle düregfühert. Nid nume dr Petrus hets im Himmu obe lah tschädere, oh mir hei nachem z'Nacht üser Lieder u Jütz lah erklinge.

Ä grosse Dank geit ah d'Ruth u David Steiner. Sie hei ihri Infrastrukur zur Verfüegig gsteut, aues parat gmacht u z'Dessert spändiert!

Eso laht sich's lah läbe...

Merci viu mau!

Heiss, heiss, heiss..

Oh üs isch es z'heiss worde u drum hi mir üsi Singprob churzerhang ids Freibad Grosshöchstette verleit.

Es paari vo üs si zerschte Mau ih däm nöii sanierte Freibad gsi u wär weiss, viellech ghörtmä ja ih Zuekunft is ä Jutz vom Sprungbrätt oder vom Plantschbecki...

Letschtä Fritig hei mir mit chli Verspätig üsi Houptversammlig chönne düreführe.

Mir hei üser zäh Traktande, ohni viu Diskussione, zügig chönne abarbeite. 

Dr Sarbach René u dr Wüthrich Tinu si scho sit über 25 Jahr bi üs im Klub u drum hei mir die zwe zum Ehremitglied dörfe ernenne.

Es isch ungloublech, was die zwe Manne für üse Klub scho hei gleischtet u geng no leischte!

Danke viu mau!

Am 20.09.2020 hi mir üse letscht gross Uftritt gha ir Chiuche z'Grosshöchstette.

Geschter, am 14.04.2022, rund angerhaub Jahr speter hi mir genau a däm Ort wieder dörfe öffentlech ufträte u das ersch no für nä guete Zwäck.

Zäme mit de PanFriends (wo das Benefizkonzärt i z'Läbe gruefe hei) u am Familiequartett Schafroth hi mir ame ufmerksame Publikum üser Kläng dörfe zum Beschte gä.

Mir bedanke üs bi aune, wo dr Wäg i d'Chiuche gfunge hei u e schöne Batze gspändet hei.

Mir wünsche öich ganz e schöni u friedlechi Oschtere.

Mit Stouz dörfe mir öich üsi zwöi nöie Mitglieder vorsteuä.

D'Nadia Schafroth ungerstützt üs aus Jodlerin u im erschte Tenor u dr Michu Schafroth begleitet üs im zwöite Bass.

Härzlech Wiukomme!

Mir wünsche öich viu schöni u gsellegi Momänte im Klub.

Sit guet ame Monet dörfe mir wieder probe u mir hei scho wieder es paar Ziu, wo mir dörfe verfouge.

Scho gli wird hie z'aktuelle Jahresprogramm ufgschautet.

Sit di nöie Massnahme vom BAG dusse si, hei mir üs leider drzue müesse entscheide,  z'Konzärt ir Chiuche abzsäge...

D'Unsicherheit, dr Proberückstang u d'Usfäu si z'gross, drum tüe mir d'Vernunft la waute u wei niemer i Gfahr bringe.

Startet guet i ds nöie Jahr u blibit gsung!

Leider chöi mir oh z'Adventskonzärt, uf Grund vo Quarantäne- u Isolationsmassnahme vo paar Jodler, nid düreführe.

Bitte düet doch öii Verwandte u Bekannte, vo dene wo dir wüsst, dass sie gärn wäre cho, über die Absag informiere.

U we glich öper vor dr lääre Chiuche steit, de söu är doch bitte bim Herrgott äs guet's Wort iilege, dass är die Pandemie söu häufe beände.

Danke viu mau!

Häbit ä schöni u besinnlechi Adventsziit u vorauem BLIBIT GSUNG!

Letschtä Samschtig hei mir sit langer Ziit, wieder mau ä Uftritt gha. Mir hei ir Chiuche z'Sigriswil, Trouig vor Sandra u am Patrick musikalisch dörfe umrunde. Mir wünsche dene beidnä aus Guete u z'Friedheit uf ihrem gmeinsame Läbeswäg u Danke für d'Iladig u das grosszügige Apéro. Merci viu mau

D'Houptversammlig het Hunger gäh u drum hei mir üs am Sunntig grad bi Kohler's z'Niederhünige zum Brätle troffe.

Es isch schön gsi di ganzi Jodlerfamilie wieder mau binang z'ha u mit Ching u Chegu ä schöne Namittag z'verbringe.

Ä grosse Dank geit a d'Familie Kohler für d'Gaschtfründschaft u ah aui, wo öpis drbi zuetreit hei.

Ändlech hei oh mir üsi Houptversammlig vom Februar chönne nachehole.

Wie's so geit are HV, giit's schöni u weniger schöni Momänte. Näbe zwe Ustritte, hei mir oh dörfe dr letscht Schafroth i üsi Reihe ufnäh!

Michu, mir wünsche dir aus Guete ih üsem Klub u viu schöni Stunge.

Dr  Hodu Mätthu hei mir zum Ehremitglied gmacht u d'Schafroth Miriam sogar zur Ehredirigäntin - härzlechi Gratulation öich zwöine!

Dr Thierstei Tönu het si's Amt aus Kassier nach "Sage und Schreibe" 34 Jahr abgäh- Itz darfsch o du, chli hingere liege.

Oh aune angere gwäute Vorstangs- u Kommisionsmitglieder viu Gfröits u gnue Biss.

Sit dä letschtä Lockerige vom BAG düe mir wieder singe! Dr Probebsuech isch no chli dürftig u d'Tön u d'Wort sitze o nümm grad aui perfekt, aber we sich jede wieder itz Füdlä chlemmt, de tönt das gly wieder wie früecher.

Ä grosse Dank geit a z'Team vo "Gerber macht's GmbH", wo scho es paar mau Platz für üs het gmacht, so dass mir es Dach überem Chopf hi gha.